Jer 30 | NdeIBE | STEP | Leli yilizwi elafika kuJeremiya livela kuJehova lisithi:

Jeremiah 30

Ukubuyiswa Kuka-Israyeli

1 Leli yilizwi elafika kuJeremiya livela kuJehova lisithi: 2 “UJehova, uNkulunkulu ka-Israyeli uthi, ‘Loba encwadini wonke amazwi engiwakhulume kuwe. 3 Izinsuku ziyeza,’ kutsho uJehova, ‘lapho engizabuyisa abantu bami u-Israyeli loJuda bevela ekuthunjweni ngibabuyisele elizweni engalinika okhokho babo ukuba libe ngelabo,’ kutsho uJehova.”

4 Amazwi akhulunywa nguJehova ngo-Israyeli loJuda yila athi, 5 “UJehova uthi: “ ‘Ukukhala kokwesaba kuzwakele – ukwesaba okukhulu, hatshi ukuthula.

6 Buzani libone: indoda ingazala abantwana na? Pho kungani ngibona wonke amadoda aqinileyo ebambe izisu zawo ngezandla njengowesifazana ohelelwayo, ubuso bonke sebube mhlotshana okokufa?

7 Yeka ukwesabeka okuzakuba yilolosuku! Kalukho oluzakuba njengalo. Kuzakuba yisikhathi sokuhlupheka kukaJakhobe, kodwa uzahlengwa kukho.

8 “ ‘Ngalolosuku,’ kutsho uJehova uSomandla, ‘ngizalephula ijogwe ezintanyeni zabo ngiqamule lezibopho zabo; abezizweni kabasayikubagqilaza futhi.

9 Esikhundleni salokho, bazasebenzela uJehova uNkulunkulu wabo, loDavida inkosi yabo, engizabavusela yona.

10 “ ‘Ngakho ungesabi, wena Jakhobe nceku yami; ungadangali, wena Israyeli,’ kutsho uJehova. ‘Ngeqiniso ngizakuhlenga ezindaweni ezikude, lenzalo yakho elizweni lokuthunjwa kwayo. UJakhobe uzakuba lokuthula futhi kanye lokuvikeleka, njalo kakho ozamenza esabe.

11 Ngilawe njalo ngizakuhlenga, kutsho uJehova. ‘Lanxa ngizichitha ngokupheleleyo zonke izizwe engikuhlakazela kuzo, wena angiyikukuchitha ngokupheleleyo. Ngizakukhuza kodwa ngokufaneleyo kuphela; kangiyikukuyekela ungajeziswanga.’

12 UJehova uthi: “ ‘Isilonda sakho kaselapheki, ukulimala kwakho akupholi.

13 Kakho okhulumela inhloso yakho, akulamuthi wesilonda sakho, akukho kuphola kuwe.

14 Bonke abasekeli bakho sebekukhohliwe; kabalandaba lawe. Ngikutshaye njengokungenziwa yisitha ngakujezisa njengokungenziwa ngolesihluku, ngoba icala lakho likhulu kakhulu lezono zakho zinengi kakhulu.

15 Kungani ukhaliswa linxeba lakho, ubuhlungu bakho obungelaphekiyo na? Ngenxa yecala lakho elikhulu lezono ezinengi ngenze lezizinto kuwe.

16 “ ‘Kodwa bonke abakudlayo bazadliwa; zonke izitha zakho zizathunjwa. Labo abakuphangayo bazaphangwa; bonke abakwemukayo ngizabemuka.

17 Kodwa ngizakusilisa ngipholise lamanxeba akho,’ kutsho uJehova, ‘ngoba kuthiwa ungolahliweyo, iZiyoni okungekho olendaba lalo.’

18 “UJehova uthi: “ ‘Ngizavuselela inotho yasemathenteni kaJakhobe ngibe lesihawu emakhaya akhe; idolobho lizakwakhiwa kutsha emanxiweni alo, lendlu yobukhosi izakuma endaweni yayo uqobo.

19 Kubo kuzavela izingoma zokubonga kanye lomsindo wokuthokoza. Ngizakwandisa amanani abo, njalo kabayikuphungulwa; ngizabenza bahlonitshwe, njalo kabayikweyiswa.

20 Abantwana babo bazakuba njengezinsukwini zakudala, lebandla labo lizamiselwa phambi kwami; ngizabajezisa bonke ababacindezelayo.

21 Umkhokheli wabo uzakuba ngomunye wabakibo; umbusi wabo uzavela phakathi kwabo. Ngizamsondeza eduze, uzakuza phansi kwami, ngoba ngubani lowo ongazinikela ukuba eduzane lami na?’ kutsho uJehova.

22 “ ‘Ngakho lina lizakuba ngabantu bami, mina ngibe nguNkulunkulu wenu.’ ”

23 Khangelani, isiphepho sikaJehova sizakhupha ulaka, umoya ozululeka usehlela phezu kwamakhanda ababi.

24 Ulaka olwesabekayo lukaJehova kaluyikudeda aze ayifeze ngokupheleleyo injongo yenhliziyo yakhe. Ezinsukwini ezizayo lizakuzwisisa lokhu.